Հունաստանում  ներկայացվել է « Փարիզ - 2024 » օլիմպիական ջահի վառման արարողության նոր քրմուհին, որի դերում հանդես կգա Մերի Մինան: Նա հույն դերասանուհի է և նկարահանվել է մի քանի հեռուստասերիալներում։ 

Միջոցառման ժամանակ դերասանուհին ասել է, որ  իր համար մեծ պատիվ է մարմնավորել քրմուհու դերը:

Ներկայացվել են նաև  աշխարհահռչակ դիզայներ Մարի Կատրանցուի ստեղծած մյուս  քրմուհիների հնագույն զգեստների ձևափոխված դիզայնը, որոնք  տարբերվում են նախորդներից:

Գլխավոր քրմուհին  ապրիլի 16 –ին  կրակը կփոխանցի առաջին ջահակրին՝  թիավարությունից  օլիմպիական չեմպիոն Ստեֆանոս Դուսկոսին, որից հետո այն  փոխանցավազքով կանցնի  Հունաստանի տարածքով:

Ապրիլի 26-ին կրակը  Աթենքում կհանձնվի  Փարիզի խաղերի կազմակերպիչներին: Կրակը  «գիշերելու է»   Ֆրանսիայի դեսպանատանը։ Հաջորդ օրը  ջահը Le Belem 120-ամյա եռակայմ առագաստանավով կուղևորվի Ֆրանսիա և մայիսի ութին  կլինի Մարսելում:

Ֆրանսիայում նախատեսված փոխանցավազքը կտևի 68 օր և կավարտվի հուլիսի 26-ին՝  խաղերի բացման արարողության ժամանակ:

Փարիզի օլիմպիական խաղերի մեկնարկին մնացել է 135 օր: