ԴԵՐԵՆԻԿ  ԱԲՐԱՀԱՄԻ  ԳԱԲՐԻԵԼՅԱՆ. Նա այսօր դարձավ 80 տարեկան: Որպես մարզիկ,  օլիմպիական խաղերի մասնակից չի եղել: Բայց նախախնամության կամքով, ՀԱՕԿ –ի  ստեղծման օրվանից,   դարձել է մեր երկրի   օլիմպիական շարժման առաջամարտիկներից մեկը: Տասնամյակներ անընդմեջ եղել է Հայաստանի ազգային օլիմպիական կոմիտեի գործկոմի անդամ, նախագահի տեղակալ, օլիմպիական քոլեջի երկարամյա ղեկավար, պատրաստել է օլիմպիական խաղերի չեմպիոններ ու մրցանակակիրներ, մրցավարել է   օլիմպիական խաղերում, համալրել է  լավագույն միցավարների  եռյակը, քանիցս եղել է ՀԱՕԿ –ի  գլխավոր  հանձնակատար – Շեֆ միսիան  օլիմպիական խաղերում և միջազագային կարգի միակ մրցավարն է աշխարհում, որ արժանացել է  միջազգային օլիմպիական կոմիտեի  շքանշանի: Նա նաև Հայաստանի ազգային օլիմպիական կոմիտեի ոսկե   շքանշանակիր է   . . .

Դերենիկ Գաբրիելյանը հայրենական սպորտի զարգացման գործում հսկայական դեր  ունի, քանզի ամենուրեք,  որպես արժանապատիվ հայորդի, հստակորեն կատարել է իր առջև դրված խնդիրներն ու  պարտականությունները: Պատահական չեն նրան շնորհված տասնյակ շքանշանները, մեդալները և պատվոգրերը:

Բոլորել է ութերորդ տասնամյակը,  բայց կեցվածքով ու  եռանդով  կարծես  ընդամենը երկու անգամ 40 տարեկան է: Ուստի  համոզված ենք, որ հայրենական սպորտի առաջընթացին Դերենիկ Գաբրիելյանը կնպաստի ևս  երկու անգամ 40 տարի :

Դերենիկ Գաբրիելյանի  << թողարկած >>  մարզական արտադրանքի  բազմաթիվ հեղինակություններ այսօր Հայաստանում չեն: Բայց նրանք չեն մոռացել իրենց սիրելի ուսուցչին և  շնորհավորել են  հեռագրերով,  հեռակապով , էլեկտրոնային փոստով և այլ միջոցներով: Նշենք մի քանի  հայտնի անուններ . Ամերիկայից՝  բռնցքամարտիկ Նշան Մունչյան , ջրացատկորդ Սիրվարդ Էմիրզյան , մարմնամարզիկ  Արթուր Հակոբյան , ակրոբատներ Մարիետա Խանյան, Արմեն  Ռուբինյան , Մարգարիտա Գևորգյան, Բուլղարիայից՝  Արմեն Նազարյան, Գերմանիայից՝ Արմեն Մկրտչյան, Արայիկ Գևորգյան, շատերը: 

Բազմաթիվ շնորհավորական և պաշտոնական  ուղերձներ են ստացվել տարբեր երկրների  բռնցքամարտի ֆեդերացիաներից՝  Իսրայելից,  Ուկրաինայից, Ղազախստանից, Ռուսաստանից,       Բելառուսից, Լեհաստանից,  Ֆրանսիայից, Մոլդովայից, Հունաստանից . . .  

Իհարկե մեծ է  Գաբրիելյանի վաստակն ու արժանիքը,  որը ձեռք է բերել  տքնաջան աշխատանքով : Դժվարին մանկություն է ունեցել և ընտանիքին օգնելու նպատակով վաղ հասակում է սկսել աշխատանքային գործունեությունը: Ահա թե ինչու նրա երջանկությունը իր ընտանիքն է,  որից է ստանում  վաղամեռիկ տիկնոջ ու  մոր կարոտը: Իսկ  զավակների և թոռների համար մեր հոբելյարը անփոխարինելի ծնող է,  պապիկ:

Մարզաշխարհի անդավաճան դեսպանը անգործության չի մատնվել. ՀԱՕԿ –ի պատվավոր փոխնախագահն է այսօր: Բռնցքամարտից ԽՍՀՄ սպորտի վարպետի հարուստ կենսափորձը, գիտելիքները և մրցավարական հմտությունները բարձր է գնահատում մարզաձևի միջազգային ֆեդերացիան, որի չեմպիոնների և վետերանների կոմիտեի անդամն է, բռնցքամարտի Եվրոպական կոնֆեդերացիայի տեխնիկական պատվիրակը ու նա հաճախ է հրավիրվում  միջազգային պաշտոնական մրցաշարերի, ղեկավարում մրցավարական հանձնախմբերը:

Հայաստանի ազգային օլիմպիական կոմիտեն Ձեզ՝ մարզաշխարհի հարգարժան երախատավոր, հոբելյանի առթիվ, մաղթում է   քաջառողջություն,  հաջողություն  կյանքում և աշխատանքում: 

Երջանիկ և երկար տարիների կյանք Ձեզ , սիրելի  Դերենիկ  Գաբրիելյան:

                         ՀԱՅԱՍՏԱՆԻ  ԱԶԳԱՅԻՆ  ՕԼԻՄՊԻԱԿԱՆ  ԿՈՄԻՏԵ