Ֆրանսիացի բարոն Պիեռ դե Կուբերտենի նախաձեռնությամբ, Սորբոնի համալսարանում,  1894 թ. տեղի ունեցած կոնգրեսում հիմնադրվեց միջազգային օլիմպիական կոմիտեն / ՄՕԿ / : Նախագահ ընտրվեց Կուբերտենի մտերիմ ընկեր, հույն Դեմետրիուս Վիկելասը: Նա կազմակերպությունը ղեկավարեց երկու տարի  / 1894—1896 թթ. /: Նրան հաջորդել են բարոն Պիեռ դե Կուբերտենը /   Ֆրանսիա, 1896–1916 և 1919–1925 , և  ՄՕԿ-ի պատվավոր նախագահ՝ 1925-1937 /,  Կոմս Անրի դը Բայե-Լատուրը / Բելգիա,  1925—1942 /,  Զիգֆրիդ Էդստրյոմը /Շվեդիա  1942-1952), Էյվերի Բրենդեջը  / ԱՄՆ 1952—1972 /,  Լորդ Մայքլ Մորիս Քիլանին / Մեծ Բիտանիա, 1972 – 1980 /,  Մարկիզ Խուան Անտոնիո Սամարանչը / Իսպանիա, 1980—2001  /,  Կոմս Ժակ Ռոգեն / Բելգիա,  2001—2013 / և Թոմաս Բախը /  Գերմանիա 2013 . . .  /:

2024թ․ օգոստոսին, Փարիզում, 33 –րդ ամառային օլիմպիական խաղերի ավարտից հետո,   Թոմաս Բախը հայտարարեց  իր մոտալուտ հեռանալու մասին: Նա պաշտոնը կլքի 2025թ.   հունիսի 25-ին, երբ կավարտվի նրա ղեկավարման առավելագույն՝ հնարավոր 12-ամյա նախագահական ժամկետը։

Միջազգային օլիմպիական կոմիտեի / ՄՕԿ / նախագահի պաշտոնին հավակնում է յոթ թեկնածու: Նրանք են՝ Հորդանանի արքայազն Ֆեյսալ իբն Հուսեյնը, բրիտանացի Լորդ Սեբաստիան Կոուն / աթլետիկայի համաշխարհային ասոցիացիայի նախագահ /, զիմբաբվեցի, միակ կին թեկնածու  Քիրսթի Քովենթրին / ՄՕԿ  մարզիկների հանձնաժողովի  նախագահ,  ՄՕԿ-ի 130-ամյա պատմությունում   առաջին կին և առաջին աֆրիկացին  /, իսպանացի Խուան Անտոնիո Սամարանչ կրտսերը /  ժամանակակից հնգամարտի միջազգային ֆեդերացիայի առաջին փոխնախագահ, ՄՕԿ-ի յոթերորդ նախագահ Խուան Անտոնիո Սամարանչի ավագ որդին /, շվեդ Յոհան Էլիաշը  / դահուկային սպորտի եւ սնոուբորդի միջազգային ֆեդերացիայի նախագահ /, ֆրանսիացի Դավիդ Լապարտիեն /  հեծանվասպորտի  միջազգային միության նախագահ, Ֆրանսիայի ԱՕԿ նախագահ / և  ճապոնացի Մորինարի Վատանաբեն /  մարմնամարզության միջազգային ֆեդերացիայի նախագահ /:  

ՄՕԿ նախագահի ընտրությունը նախատեսված է  2025թ․ մարտի 18-21-ը  Աթենքում կայանալիք  կազմակերպության 143 –րդ   նստաշրջանում։