Երկու օր հետո, փետրվարի 20 –ին, Հայաստանի տղամարդկանց բասկետբոլի  ազգային հավաքականը   Ալբանիայում  կմասնակցի չափազանց պատասխանատու մրցամարտի: 2027թ. աշխարհի առաջնության նախընտրական փուլի վերջին խաղում մերոնք Տիրանայում պատասխան  հանդիպումով կմրցեն տանտերերի ընտրանու հետ։ Ասենք, որ Երևանում  նշած մրցակիցների առաջին մրցավեճը անցավ արտակարգ լարված պայքարում:

Կարեն Դեմիրճյանի անվան ՄՀՀ – ի տրիբունաներում տեղ զբաղեցրած մարզասերները կհիշեն, որ խաղավարտին մնացել էին վայրկյաններ, իսկ տանտերերը հաշվի մեջ առաջ էին ընդամենը երկու միավորով՝ 81 : 79: Հետևեց հյուրերի գրոհը և  նրանց խաղացողը հաղթական վերջաբանի հասնելու նպատակով երեք միավորանոց նետում կատարեց, որը ցանկալի արդյունք չբերեց: Ավելին, օղակից ետ եկած գնդակին տիրեցին տանտերերը և դիպուկ նետումով ավելացրին հաղթական հաշիվը: Նախ ՝ երկու միավոր ու ևս նույնքան՝ տուգանային արդյունավետ նետումների շնորհիվ: Արդյունքում Հայաստանի հավաքականը հաղթեց 84:79 հաշվով:

Մեր հավաքականի գլխավոր մարզիչն է  սերբ Բոգդան Կարաչիչը: Մարզչական շտաբում ընդգրկված են նաև հույն մասնագետ Կոստաս Պապավասիլեոուսը և ՀՀ պատանեկան հավաքականի ավագ մարզիչ Միքայել Պողոսյանը։ Հուսանք, որ մերոնք կզարգացնեն հաջողությունը և ասպարեզից դուրս կգան հաղթանակած:

Հայաստանի  բասկետբոլիստներն արդեն մրցավայրում են: Թիմը  հանդես կգա հետևյալ կազմով․

Ալբերտ Թադևոսյան

Անդրե Սպայթ Մկրտչյան

Քրիս Ջոնս

Զաք Թավիտյան

Արայիկ Գևորգյան

Գաբրիել Աճեմյան

Յուրա Մելիքյան

Դավիթ Խաչատրյան

Կարեն Մելիքյան

Դանիել Կիրակոսյան

Հայկազ Գրիգորյան

Միհրան Ներսես