Ալբանիայի մայրաքաղաք Տիրանայում ավարտվեց մինչև 23 տարեկան ազատ ոճի ըմբիշների Եվրոպայի առաջնությունը:

Հայաստանի ներկայացուցիչները նվաճեցին եռագույն՝  մեկական ոսկե, արծաթե և բրոնզե մեդալ:

Մարզաձևի ավանդույթներով հարուստ  Արտաշատի` Ռազմիկ Գոլեցյանի անվան մասնագիտացված մարզադպրոցը շարունակում է շնորհալի տղաներով համալրել երկրի տարիքային տարբեր խմբերի հավաքականները:

Նշանավոր մասնագետ հայրիկի գործը պատվով շարունակում է որդին ՝ Ռաֆիկ Գոլեցյանը: Նրա սան Լևիկ Միքայելյանը / 61 կգ / Տիրանայում շարունակելով հաղթարշավը, եզրափակիչում հանդիպեց ադրբեջանցի Ջեյհուն Ալլահվերդիևի հետ։ Ինչպես ակնկալվում էր, մրցագորգի վրա ծավալվեց արտասովոր լարված պայքար: Մրցակիցները հմտորեն պաշտպանվում էին, թեև շարունակաբար փորձում էին գրոհել, միմյանց նկատմամբ տեխնիկական հնարքներ կատարել: Այդ պարագայում որոշիչ դեր կատարեցին բարոյակամային որակները, որով աչքի ընկավ հայորդին. նա հաղթեց / 2 : 1 / ու պարզճակատ հեռացավ ասպարեզից:  

Դժգոհելու տեղիք չտվեց նաև Կնյազ Իբոյանը / 92 կգ /: Արշալույսցի / Էջմիածին  / մարզիչ Նարեկ Եդիգարյանի սանը գրավեց երկրորդ տեղը և տուն կվերադառնա արծաթե մեդալով:

Ծիրանագույն ՝ բրոնզե մեդալի արժանացավ Արշակ  Հայրապետյանի սան, գերծանրքաշային / 125 կգ /  Խաչատուր Խաչատրյանը: Մարմնեղ տղաների պայքարում մեդալ նվաճելը արդեն մեծ պատիվ է, իսկ այն, որ երրորդ տեղի համար գոտեմարտում նա << նոկաուտով >> հաղթեց լեհ Միխայիլ Դուբովսկուն / 10 : 0 /,  վկայում  է, որ մեր ազգային թիմում կունենանք հուսալի համալրում: Ի դեպ, Խաչատուրը ՀՀ ըմբշամարտի ֆեդերացիայի նախագահ Ռոբերտ Խաչատրյանի որդին է:

Հաջողության առթիվ շնորհավորում ենք մարզաձևի հանրապետական ֆեդերացիային,  հավաքականի մարզչական խումբը գլխավորած Հաբեթնակ Կուրղինյանին, ըմբիշների անձնական մարզիչներին և, իհարկե, մեդալակիրներին: