Ինչպես արդեն հայտնել ենք, 2025 թվականը յուրահատուկ տարի է ծանրամարտի միջազգային ֆեդերացիայի / IWF / համար: Բոլորում է  կառույցի  հիմնադրման 120-ամյակը:

Կազմակերպությունը ստեղծվել է  1905թ.  հունիսի 10-ին՝ Դույսբուրգում (Գերմանիա):  

Տարեթվի առթիվ,  120 –ամյա  ֆեդերացիան,   փետրվարի 11-ից մինչև հունիսի 10-ը,   ուղիղ 120 օր, ներկայացնում է  IWF-ի պատմության որևէ կարևորագույն  իրադարձություն. առանցքային պահ,  լեգենդներին նվիրված դիմանկարներ և այլն:

Մենք արդեն տեղեկացրել ենք, որ IWF – ն   անդրադարձել է  բուլղարահայ լեգենդար ծանրորդ, Նորայր Նուրիկյանին: Եվ ահա կազմակերպությունը գրել  է  Յուրի Վարդանյանի կենսագրությունը, որը զետեղում ենք որոշ կրճատումներով.   

<<  . . .  Ծնվել է  Գյումրիում՝ 1956թ.  հունիսին:  

14 տարեկանից է  զբաղվել ծանրամարտով՝  հորեղբոր ղեկավարությամբ: 1977թ.  նվաճել է իր առաջին ոսկե մեդալը Շտուտգարտում (Գերմանիա) կայացած աշխարհի առաջնությունում։ Նա պահպանել է իր տիտղոսը հաջորդ երկու մրցաշրջաններում՝ 1978 և 1979 թվականներին։ Մրցելով 82.5 կգ քաշային կարգում,  1980թ. Մոսկվայի օլիմպիական խաղերի է մեկնում որպես հաղթողի  հիմնական ֆավորիտներից  մեկը և  հաստատում է իր հեղինակությունը՝ համոզիչ արդյունքով: Նա այդ քաշային կարգում առաջինն էր, որ երկամարտում հատեց  400կգ –ի  /  177.5 կգ + 222.5 կգ / սահմանագիծը:  

Նրա  ֆանտաստիկ ցուցանիշը աներեր է մնում, քանզի ծանրամարտում փոփոխություն է կատարվել քաշային կարգերում . . . >> :   

Մեր կողմից  հավելենք, որ մոսկովյան խաղերում նրա փայլուն հաղթանակով հիացած մարզաձևի միջազգային ֆեդերացիայի այն ժամանակվա նախագահ Գոտֆրիդ Շյոդլը հետևյալն է ասել. << Յուրին  ամենաթանկագին ադամանդն է համաշխարհային  բարձրագույն նվաճումների հասած մարզիկների  ցանկում: Ցնցված եմ  հայորդու աներևակայելի կատարումներով: Յուրին ֆանտաստիկա է և նույնիսկ դարավարտից  20 տարի առաջ կարող եմ շեշտել, որ նա է  դարի ռեկորդակիրը . . . >>:

Յուրի Վարդանյանը  սահմանել է համաշխարհային 43 ռեկորդ, պաշտոնական մրցումներում արժանացել է 111 ոսկե մեդալի, երեք անգամ, տարբեր մրցումներում, մեկ օրում,  սահմանել է աշխարհի  5 –ական ռեկորդ: Մոլորակի վեցակի և Եվրոպայի յոթակի ոսկե դափնեկիր է . . .

2018թ.  նոյեմբերին, երկրային կյանքին անժամանակ հրաժեշտ տվեց ծանրահարթակի արքա,   62-ամյա Յուրի Վարդանյանը: