Մարզական որակներով բնածին օժտված տղա է  երևանցի Եղիշե Մոսեսյանը: Ջրվեժի մարզադպրոցում, մարզիչ Արմեն Շահվերդյանի գլխավորությամբ է նա մուտք գործել ազատ ըմբշամարտ:

Մշտապես հաղթանակի ձգտող մարզիկը 15 տարեկանում դարձավ Եվրոպայի կրտսեր տարիքայինների  հաղթող: Ընթացիկ մրցաշրջանում 16 – ամյա Եղիշեն երրորդը ճանաչվեց Եվրոպայի՝ մինչև 17 տարեկանների ստուգատեսում: Եվ ահա, ամիսներ անց, նույն տարիքայինների աշխարհի առաջնությունում կրկին դարձավ բրոնզե մեդալակիր:

Ուսումնասիրեցինք  Աթենքի  առաջնությունում  71 կգ քաշային Եղիշեի անցկացրած գոտեմարտերը: Պարզվեց, որ դժվարին մրցակցությունում է նա հասել պատվո պատվանդան. Ռուսաստանցուն հաղթել է  8 : 3, թուրքին ՝ 9 : 7,  ամերիկացու հետ հաջորդ  գոտեմարտում գրանցվեց  հավասար ՝  5 : 5 հաշիվ, որտեղ առավելություն տրվեց   վերջինը միավոր վաստակած մրցակիցին:

Դժվարին  եղավ ուզբեկ մրցակցի դեմ բրոնզե մեդալի համար մղված պայքարը:  Եղիշեն  սկզբում ետ ընկավ  հաշվում ՝ 2 : 6:  Այս պարագայում  ընդգծվեց պարտության մտքի հետ չհաշտվող հայ մարզիկի անհաշտ բնավորությունը: Ցուցադրելով բարոյակամային չափազանց բարձր որակներ,  արժանապատիվ մեր պատանին անընդմեջ հինգ միավոր վաստակեց և 7 : 6 հաշվով  հաղթանակ գրանցեց իր օգտին:

Համոզվեցինք նաև, որ ազատ ըմբշամարտում  ամուր ու կայուն է միավորների հաշվարկով առաջինը ճանաչված ամերիկյան դպրոցի հիմքերը, վկան ՝ նվաճած չորս ոսկե մեդալը: Զարմացանք երկրորդ տեղը գրաված իրանցիների մասնակցությամբ եզրափակիչ գոտեմարտերի համար: Փառաբանված իրանցի վարպետների հետնորդներից հինգը մտավ եզրափակիչ փուլ և, ով զարմանք, նրանցից ոչ մեկը հաղաթանակ չտոնեց:

Կարծում ենք մասնագետներին չգոհացրեց  երրորդը ճանաչված ՌԴ հավաքականը, որի հաշվին գրանցվեց ընդամենը երկու չեմպիոն:

 Հուսանք, որ Եղիշե Մոսեսյանի  հաջողությունը շարունակական կլինի: