Վերջին շրջանում  հայ  ֆուտբոլասերը այնքան չէր ուրախացել, որքան սեպտեմբերի 9 –ի  երեկոյան:

Աշխարհի առաջնության ընտրական մրցաշարի երկրորդ տուրում  Հայաստանի հավաքականը, Երևանի հանրապետական ստադիոնում, 2:1 հաշվով հաղթեց   Իռլանդիայի թիմին:

Առաջին գոլը գրանցվեց առաջին խաղակեսի վերջում: 44 –րդ րոպեին հյուրերն իրենց տուգանային հրապարակում կոպտորեն վայր գցեցին Լուկաս Սելարայանին: Նշանակվեց 11 մետրանոց, որը դիպուկ հարվածով վստահորեն իրացրեց  Էդուարդ Սպերցյանը։

Ընդմիջումից հետո, 51-րդ րոպեին, Նաիր Թիկնիզյանը գնդակը փոխանցեց Հրանտ Ռանոսին, որը  առանց հապաղելու գրավեց մրցակցի դարպասը:  

Ուրախության ալիքը տարածվեց ոչ միայն հանրապետական մարզադաշտում,այլ, համոզված ենք, ամբողջ հանրապետությունում  և մրցամարտի ընթացքին հետևած աշխարհասփյուռ հայության շրջանում:

Վեց րոպե անց,  57-րդ րոպեին,  հյուրերից  Էվան Ֆերգյուսոնին հաջողվեց << թրջել >>  հաշիվը: Եվ սակայն, տանտերերի եռանդուն գործողությունները չընդհատվեցին: Ավելին, 88 –րդ րոպեին, դարձյալ Նաիր Թիկնիզյանը փոխանցումով հարվածի դուրս բերեց փոխարինման ելած   Արթուր Սերոբյանին: Նրա  անվրեպ հարվածից հետո լուսատախտակի վրա վառվեց 3 : 1 հաղթական հաշիվը: Ոչինչ որ մրցավարները գոլը չգրանցեցին, քանզի տեսագրությունը ցույց տվեց, որ գոլաահարը ինչ որ միլիմետրերով կամ սանտիմետրերով  գտնվել է խաղից դուրս վիճակում:

F խմբում Հայաստանի հավաքականը երեք  միավորով զբաղեցնում է երկրորդ տեղը:  

Խաղավարտից հետո ՀՀ հավաքականի գլխավոր մարզիչ Եղիշե Մելիքյանը ասել է, որ գոհ է խաղից, գոլերից: Մեր ազգը հաղթանակների կարիք ունի և դա  ֆուտբոլիստները կարող են անել: Բայց հաղթանակը չպիտի  շատ ուռճացնել, որովհետև առջևում  դժվարին  շատ խաղեր կան . . .  

Մարզիչը նաև շնորհակալ է այն մարզիկներին, որոնք մեկնարկային կազմում չէին ու  փոխարինողների նստարանին են եղել,  բայց չեն դժգոհել: Հակառակը, ավելի ուշ ասպարեզ մտած Վահան Բիչախչյանը և Արթուր Սերոբյանը գործեցին նվիրվածությամբ ու պայքարեցին մինչև վերջ:

Անելիքներն ու  սխալները քիչ չեն, որոնց շտկման համար կպահանջվի քրտնաջան աշխատանք և ժամանակ:

Հոկտեմբերի 11-ին մեր ազգայինը  կհյուրընկալվի Հունգարիայի ընտրանուն։