Տարին բոլոր  մարզական հևքն է թևածում  Ծաղկաձորի օլիմպիական մարզավանում: Այնտեղ պայմանները և բնությունը հրաշալի են: Հատկապես տեղացած առատ ձյան հաստ շերտը այցելուներին  հնարավորություն է տալիս թարմ օդում  կոփել իրենց առողջությունը: Ձյան ծածկույթը ակոսողների թվում կլինեն նաև Հայաստանի տարբեր մարզաձևերի ներկայացուցիչներ:

Հունվարի 10 –ից մրցաշրջանի նախապատրաստական առաջին ուսումնամարզական հավաքը կսկսեն մեր երկրի հունահռոմեական ոճի ըմբիշները:

Հավաքականի գլխավոր մարզիչ, վաստակավոր մարզիչ Արմեն Բաբալարյանը զրույցի ժամանակ ասաց, որ մարզումների են հրավիրվել 36 տղաներ: Շեշտը դրվելու է  ընդհանուր ֆիզպատրաստականությունը բարելավելուն: Երկշաբաթյա  աշխատանքից հետո պարապմունքները կշարունակվեն Երևանում: 

Նոր մրցաշրջանը հագեցած է միջազգային մրցումների խիտ գրաֆիկով: Հունահռոմեականների համար առաջին մրցուղերթը կլինի Էստոնիայի մայրաքաղաք Տալլինում փետրվարի հինգին մեկնարկող միջազգային մրցաշարը: Մեր երկիրը մրցավայր կգործուղի  << հարուստ թիմ >>,  քանզի մարզչական խորհուրդը, փորձառուներից բացի, նպատակ ունի ստուգել նաև երիտասարդ ըմբիշների ընդհանուր պատրաստականության մակարդակը:

-  Տուն վերադառնալուց հետո կշարունակվեն մարզումները: Ցանկություն կա ընթացքում  տղաներին  ևս 1 – 2 միջազգային ստուգողական մրցաշարերի ուղարկել: Ուզում ենք, որ Սերբիայի  Զրենջանին քաղաքում մարտի 9 –ին սկսվելիք Եվրոպայի մինչև 23 տարեկանների առաջնությունում մրցավայրին բարձր տրամադրությամբ հրաժեշտ տան մեր պատվիրակները: Հապա հաջորդ ամսի երրորդ տասնօրյակում Ալբանիայի մայրաքաղաք Տիրանայում կայանալիք եվրոպական երկրների գլխավոր թիմերի միջև անցկացվելիք ստուգատեսը՝ Եվրոպայի առաջնությունը . . . Ըմբիշի համար չափազանց մեծ պատիվ է  դառնալ Հին աշխարհամասի չեմպիոն  կամ՝  մրցանակակիր:

Գլխավոր մարզչի խոսքերը հիշեցրին անցյալ տարեվերջում տեղի ունեցած Հայաստանի առաջնությունը, որի ավարտից հետո նա խոստովանել է,  որ  բավականություն է ստացել ծավալված գոտեմարտերի ընթացքից.  ի հայտ  են եկել նոր անուններ ու մի շարք երիտասարդներ հաղթանակներ են  տոնել  փորձառուների նկատմամբ, ուստի  նոր մրցաշրջանում հավաքականի կազմը  որոշ փոփոխություններ կկրի . . .