2026, 2030 և 2034թթ. ձմեռային օլիմպիական խաղերի կազմկոմիտեները համագործակցության համաձայնագիր են ստորագրել: Նշած կազմակերպությունները միասին աշխատանքներ կտանեն օլիմպիական ժառանգության ստեղծման նպատակով:

Փաստաթղթում նշվում է, որ մրցաշարերի կազմակերպիչները՝  Միլանը և Կորտինա դ'Ամպեցոն, Ֆրանսիական Ալպերը ու ԱՄՆ Յուտա նահանգը կհամագործակցեն մարզիկների համար պայմանների բարելավման, շրջակա միջավայրի պահպանման և խաղերի համար երկարաժամկետ ժառանգություն ստեղծելուն ուղղված նախագծերի և հետազոտությունների շուրջ:

Յուտայի նահանգապետ Սփենսեր Քոքսը ասել է, որ պատմության մեջ առաջին անգամ երեք կազմկոմիտեների ներկայացուցիչները միավորվել են: Սա լավ է  նաև միջազգային հարաբերությունների համար:

Քոքսը հիշեցրել է, որ Սոլթ Լեյք Սիթիում անցկացված 2002թ. մարզահանդեսը  դեռևս համարվում է  օլիմպիական ժառանգություն կառուցելու մոդել. շատ մարզադաշտեր և ենթակառուցվածքներ դեռևս օգտագործվում են:

Նշենք, որ վերջերս Միլանում կայացած ՄՕԿ-ի նստաշրջանում 2030 և 2034թթ.  ձմեռային  խաղերի կազմակերպիչները հաշվետվություն են ներկայացրել միջոցառումների   նախապատրաստական աշխատանքների վերաբերյալ։