Փետրվարի 19 - 22-ը Գերմանիայի Կոտբուս քաղաքում կանցկացվի  սպորտային մարմնամարզության աշխարհի 2026թ.գավաթի խաղարկության առաջին փուլը։

Մրցաշարում  ավանդաբար ընդգրկվում են համաշխարհային մարմնամարզության  անվանի վարպետները:

Մարզաձևի ՀՀ ֆեդերացիան հրապարակել է մեր թիմի կազմը. Համլետ Մանուկյան, Մամիկոն Խաչատրյան, Արթուր Ավետիսյան և Արթուր Դավթյան:

Նշած անունները մարմնամարզության հայկական դպրոցի պատիվը բարձր են պահում միջազգային ասպարեզներում:

Արժե նշել, որ  գավաթի խաղարկության փուլերում մասնակիցները մրցում են առանձին գործիքների հաշվարկով՝ ըստ նախասիրությունների: Սա նշանակում է, որ  ի տարբերություն աշխարհի, Եվրոպայի առաջնությունների կամ օլիմպիական խաղերի, այստեղ չկա բազմամարտ կամ թիմային պայքար: Յուրաքանչյուր մրցաձևում հաղթում են բարդ ծրագիր ներկայացնող ու շատ միավորներ վաստակող մարզիկները: Իհարկե գնահատվում է նաև կատարողական վարպետությունը:  

Կոտբուսում կայանալիք միջոցառումը  կարևոր է նոր մրցաշրջանի բացումը հաջողությամբ սկսելու և անհատական վարկանիշային միավորներ վաստակելու համար: