Միջազգային օլիմպիական կոմիտեն հայտարարություն է տարածել՝ ի պատասխան այն ենթադրությունների, որ որոշ միջոցառումներ կարող են անցկացվել և՛ ամառային, և՛ ձմեռային խաղերի ժամանակ։

Միլանի և Կորտինա դ'Ամպեցոյի խաղերը  ավարտվեցին, և կազմակերպիչներն արդեն  սպասում են Լոս Անջելեսում կայանալիք 2028թ.  ամառային խաղերին։ Ծրագրի համար արդեն պաշտոնապես հայտարարվել է հինգ նոր մարզաձև՝ կրիկետ, բեյսբոլ/սոֆթբոլ, դրոշ - ֆուտբոլ, լաքրոս և սքվոշ։ Մինչդեռ, Ֆրանսիայի  Ալպերում  2030 թ. նախատեսված ձմեռային օլիմպիական խաղերի միջոցառումների ցանկը դեռևս որոշված չէ։ Այն վերջնականորեն կհաստատվի ՄՕԿ-ի գործկոմի նիստում՝ առաջիկա հունիսին։

«Միայն պաշտոնապես ճանաչված միջազգային ֆեդերացիաների մարզաձևերը կարող են ներառվել կամ սկզբնական ծրագրում, կամ որպես լրացուցիչ մարզաձևեր, որոնց առաջարկում է օլիմպիական խաղերի կազմակոմիտեն:

ՄՕԿ-ի պաշտոնական ճանաչմանը դիմելիս հաշվի են առնվում մի շարք գործոններ։ Դրանք ներառում են (բայց չեն սահմանափակվում) մարզաձևի զարգացումը,  հասանելիությունը, կառավարման կառուցվածքը, ֆինանսական կայունությունը, միջազգային մրցումների կազմակերպումը, մարզիկների ներկայացվածությունը, անվտանգության միջոցառումները և համընդհանրության չափանիշներին համապատասխանելը:

Միջազգային այն ֆեդերացիաները, որոնք համապատասխանում են անհրաժեշտ չափանիշներին, կքննարկվեն ՄՕԿ-ի պաշտոնական ճանաչման համար», -  գործընթացի մասին ասվում է ՄՕԿ- ի հաղորդագրությունում:

Այնուամենայնիվ, շարունակվում են  ենթադրությունները, որ որոշ մարզաձևեր կարող են տեղափոխվել ամառային խաղերից՝ ձմեռայինում:

ՄՕԿ-ի  աշխատանքային խմբում եղել է  նաև կարծիք  այն մասին, որ  քրոս քանթրի վազքը և հեծանվավազքը մեծ հավանականություն ունեն ընդգրկվելու 2030թ. ձմեռային խաղերում։

«Կարծում եմ՝ այս հարցը ճիշտ ժամանակին է ի հայտ եկել,  քանի որ ՄՕԿ-ի նախագահ Քիրսթի Քովենթրին ակնհայտորեն պատրաստ է նորովի նայել ծրագրին և այն ամենին, ինչը կարող է տարածվել մարզադաշտից այն կողմ՝ ձմռան և ամռան այս համադրությանը։ Ես միշտ ցանկացել եմ, որ քրոս քանթրի վազքը վերադառնա, և դրա համար կան բազմաթիվ պատճառներ։ Դրանցից մի քանիսը հուզական են։ Բայց դա նաև Աֆրիկային լիարժեք ներկայություն կտա ձմեռային խաղերում», - ասել  է աթլետիկայի համաշխարհային ֆեդերացիայի նախագահ Սեբաստիան  Քոուն։

«Ապագայի համար պիտանի» գործընթացի շրջանակներում ստեղծված աշխատանքային խումբը ներկայումս կենտրոնացած է 2030թ. կայանալիք ձմեռային խաղերի ծրագրի (ներառյալ՝ մարզաձևերը, միջոցառումները և քվոտաները) կատարելագործման վրա։