Մարզասերը սովորաբար  պակաս հետաքրքրություն է դրսևորում երիտասարդական մրցաշարերի նկատմամբ: Բայց այն ինչ երեկ տեղի ունեցավ Եգպտոսի Իսմայիլիա քաղաքում անցկացվող ծանրամարտի աշխարհի երիտասարդական առաջնության աղջիկների մրցաշարում՝ սպասածից վեր էր:

86 կգ քաշայինների մրցավեճը  լարվածությամբ և միմյանցից հետ մնալ չցանկացող անկոտրում կամքով օժտված  աղջիկների եռյակը,   կարծում ենք վեհացրեց նույնիսկ ամենախիստ քննադատներին:

Պայքարը մոտենում էր ավարտին, իսկ հաղթողին գուշակելը դեռևս անհնար էր: Եվ այդ պարագայում  հաղթող եռյակից մեկը Եվրոպայի չեմպիոնուհի  մեր Էմմա Պողոսյանն էր: Երբ նա հրումում երկրորդ մոտեցմամբ  կարողացավ գլխավերևում պահել 142 կգ –ն, թվաց, որ մեր հավաքականի հաշվեկշռին, Աննա Ամրոյանից / 77 կգ / հետո,  երկրորդ ոսկին է գրանցվում: Ավաղ, չստացվեց: Ճիշտ է, Էմման երրորդ մոտեցմամբ երկու կիլոգրամով ավելացրեց իր հնարավորությունը, սակայն թուրքմենուհի և չինուհի մարզուհիներից հետո,  երկամարտի 253 կգ  / 109 կգ + 144 կգ / արդյունքով,  նա կանգնեց պատվանդանի << բրոնզե >> աստիճանին:

94 կգ քաշային տղաների պայքարում Հայաստանի ներկայացուցիչ Վալերիկ Մովսիսյանը պոկում վարժությունում 164 կգ արդյունքով բրոնզե մեդալ նվաճեց,  իսկ ահա  հրումում նա  զրո ստացավ:

Առաջնությունը այսօր կհատի եզրագիծը: Մեր հավաքականից ծանրահարթակ կելնեն  Գրիգոր Ղազարյանը / 110 կգ / և գերծանր քաշային Գագիկ Մկրտչյանը: