Ավարտվում է երևանյան ստուգատեսը

12:00 - 17 Դեկ, 2018

Երևանում վաղը կավարտվի Եվրոպայի  Արևելյան  երկրների մինչև 15 տարեկան վոլեյբոլիստների առաջնության ընտրական մրցաշարը: Բայց տանտերերի համար առաջնությունն ավարտվեց դեկտեմբերի 16 –ին ` չորրորդ անընդմեջ պարտությամբ:

Վոլեյբոլի հանրապետական ֆեդերացիայի գլխավոր քարտուղար Կարեն Ասմարյանը զրույցը սկսեց  Հայ –Սլավոնական համալսարանին ուղղած շնորհակալական խոսքերով: Միայն այդ բուհի մարզադահլիճը բավարարեց համապատասխան չափանիշներին և այն սիրով տրամադրվեց մասնակիցներին: Ինչ վերաբերում է մերոնց խաղամակարդակին, ասենք, որ թիմը ձևավորվել է երեք ամիս առաջ, համալրվել է հիմնականում  Երևանի, Վանաձորի և Եղեգնաձորի պատվիրակներով:  Այդ ընթացքում կազմակերպվել են ուսումնամարզական հավաքներ և ստուգողական մրցումներ: Եվ սակայն այդ ամենը քիչ բանով օգնեցին մերոնց ելույթներին, որոնք, ինչպես ցույց տվեցին հանդիպումները, հաստատեցին տանտերերի  մրցափորձի պակասը: Մեր երկրի անկախացումից հետո,սա մեզանում կայացած դասական վոլեյբոլի միջազգային առաջին մրցաշարն է: Այնուամենայնիվ մարզաձևից հարուստ ավանդույթներ ունեցող Ռուսաստանի, Բելառուսի, Լիտվայի և Լատվիայի ուժեղ  հավաքականների հետ խաղերը  նպաստեցին մեր տղաների վարպետության առաջընթացին:

Մրցաշարի օրերին մարզասերներով  լեփլեցուն դահլիճը վկայեց, որ մեզանում սիրում են վոլեյբոլը: Մնում է, որ երկրի բոլոր մարզերում ստեղծվեն համապատասխան պայմաններ, թիմեր, կազմակերպվեն ներքին մրցումներ: Դա կլինի մարզաձևի մասսայականացման հիմնական քայլը:

Ավելորդ չէ նշել, որ մասնակիցները  գոհ մնացին Օլիմպավանում ստեղծված սնվելու և  գիշերելու պայմաններից:

 

ՀԱՕԿ լրատվական բաժին

 

 

 

Այլ նորություններ