Փարիզում անցկացվեց ձյուդոյի << Գրան պրի >> միջազգային վարկանիշային մրցաշար: Մասնակիցների թվում էին Հայաստանի երկու պատվիրակներ:  Ֆերդինանդ Կարապետյանը / 73կգ / իր հաշվին երեք հաղթանակ գրանցելուց հետո  պարտություն կրեց և մրցանակակիր չդարձավ: Ֆերդինանդը սփոփվեց այնքանով, որ վաստակեց 260 միավոր: Նրա թիմակից Արսեն Խանջյանը / 90 կգ / ձախողվեց հենց առաջին գոտեմարտում:

Փարիզից մեր երկյակը, գլխավոր մարզիչ Արմեն Նազարյանի ղեկավարությամբ, մեկնել է  Գերմանիայի Համբուրգ քաղաք, որտեղ մասնակցում է ուսումնամարզական  10 –օրյա հավաքի:Նպատակը   Դյուսելդորֆում անցկացվող  << Մեծ սաղավարտ >> անվանումով վարկանիշային մրցաշարում հաջողության հասնելն է, որը կմեկնարկի փետրվարի 22 – ին: Թիմը  Երևան կվերադառնա փետրվարի 25 –ին:

Պարապուրդի չեն մատնվում նաև պատանի և երիտասարդ ձյուդոիստները: Հավաքականի ավագ մարզիչ Հովհաննես Դավթյանի գլխավորությամբ մարզիկները Թբիլիսիում համատեղ պարապում են տեղացիների հետ:  Հայաստան վերադառնալուց հետո տղաների  մի մասը հանդես կգա Գյումրիում փետրվարի 24 –ին մեկնարկող ՀՀ երիտասարդական առաջնությանը:

ՀԱՕԿ լրատվական բաժին