Այսօր՝ մայիսի 20 –ին հայտնի դարձավ, որ պղծել  են  << Արարատ-73 >> -ին նվիրված արձանախումբը։ Գողացել են երրորդ շարքում տեղադրված լեգենդար թիմի գլխավոր մարզիչ, օլիմպիական չեմպիոն  Նիկիտա Սիմոնյանի, թիմի պետ  Ռոբերտ Ծաղիկյանի, վաստակավոր մարզիչներ Հարություն Քեհեյանի և Հովհաննես  Աբրահամյանի  արձանները:

Գողության փաստով ոստիկանությունում նախապատրաստվում են նյութեր: Կատարվածից խիստ վրդովված են նաև << Արարատ - 73 >> -ի ֆուտբոլիստները:

2016 թ․ հոկտեմբերի 10 –ին  է  չեմպիոնների արձանախումբը իր հիմնական գրանցումը ստացել   <<Հրազդան >>  ստադիոնի հարևանությամբ , այն մարզադաշտի , որը եղել է մեր ֆուտբոլի հաղթանակների խորհրդանիշը:

Արձանախմբի ստեղծման հովանավոր , անվանի բարեգործ, ՀԱՕԿ -ի նախագահ Գագիկ Ծառուկյանի  բարի ցանկությամբ,   բացումը, հանդիսավոր պայմաններում , կոմպոզիտոր Մատվեյ Բլանտերի << Ֆուտբոլային  քայլերգի >>  հնչյունների ուղեկցությամբ ,   կատարել են   հայրենական ֆուտբոլի բոլոր ժամանակների լավագույն թիմ, ոսկեզօծ  << Արարատի >>  ֆուտբոլիստները:

Երևանի << Արարատի >> ամենափառավոր էջը  գրվել է 1973 թվականին , երբ  հայաստանյան թիմը  միաժամանակ  նվաճել է Խորհրդային Միության  և՛ չեմպիոնի  և ՛գավաթակրի կոչումը: Բյուրեղապակյա մրցանակը արարատցիներին է հանձնվել  1973 թ․ հոկտեմբերի 10 –ին: 

Ի դեպ,   << Արարատը  >> գավաթը նվաճել է  նաև 1975 –ին , իսկ 1971 –ին և 1976 –ին դարձել է  ԽՍՀՄ առաջնության արծաթե մեդալակիր: 1954 և 1976 թվականներին արարատցիները  հռչակվել են ԽՍՀՄ գավաթի խաղարկության երկրորդ մրցանակակիր :

Արձանախումբը հարստացրել է մեր մայրաքաղաքի պատմամշակութային կոթողների ցանկը։ Այցելուների թվում  զգալի տոկոս  են կազմում բազմաթիվ պատանիներ , որոնց  թվում, անշուշտ, քիչ չեն լինի նաև  շնորհալի ու խոստումնալից ապագա ֆուտբոլիստներ:

Հուսանք, որ իրավապահ մարմինները հավատարիմ կմնան իրենց կոչմանը , կգտնեն սրբապիղծներին, որոնք կստանան արժանի պատիժ։