ԿՈՐՍՏԻՑ ՓՐԿՎԱԾ ՄԱՐԶԱՁԵՎ

13:52 - 03 Փետ, 2021

ԽՍՀՄ տարիներին ԶԼՄ – ներում  հաճախ էին  հրապարակվում Հայաստանի սինխրոն լողի և նրա ներկայացուցիչների վերաբերյալ նյութերը:

Հետաքրքրվեցինք մարզաձևի հայկական դպրոցի ճակատագրով: Պարզվեց, որ այն փրկված է կորստից: Զրուցեցինք մարզաձևի նվիրյալ Անահիտ Թավրիզյանի հետ:

        - Խմբեր ունենք միայն Երևանում: <<   Հիլս >>  ջեռուցվող  լողավազանում  մարզաձևով զբաղվում են շուրջ 35 աղջիկներ, -  ասաց Անահիտը: -  Օգտվելով առիթից ուզում եմ  շնորհակալական խոսք ասել լողավազանի ղեկավարությանը, տնօրեն Գեղամ Հովեյանին: Գնահատելով իրավիճակը այդ կոլեկտիվը կես գնով է բոլոր պարապողներին տրամադրում <<  ջուրը  >>  : Ինչ վերաբերում է օլիմպիական ուղեգրերին, ասեմ,  որ խաղերին մասնակցելու իրավունք են ստանում միայն աշխարհի 22 լավագույն թիմերը: Մենք այդ ցանկում լինել առայժմ չենք կարող: Նպատակ ունենք դառնալ  << Փարիզ  - 2024 >> խաղերի մասնակից: Հավելեմ, որ 32 –րդ ամառային օլիմպիական խաղերի որակավորման մրցաշարը կայանալու է Տոկիոյում՝ մայիսին:

 

       - Ի ՞ նչ կասեք առաջիկա ծրագրերի մասին:

       -  Ուզում ենք մասնակցել Սերբիայում ապրիլին նախատեսված  միջազգայինին: Եթե դա չհաջողվի, ապա հանդես կգանք հուլիսին կայանալիք մրցումներից մեկում: Հաստատ կարող եմ ասել ,որ մեր երկյակը  պայքարի կբռնվի  Մոնրեալում օգոստոսին կայանալիք աշխարհի առաջնությունում: 15 –ամյա Ամալյա Բարիկյանը և նրանից երեք տարով մեծ Մերի Մարտոյանը կմրցեն մենալողում և զուգալողում:

 Անահիտ Թավրիզյանը եղել է մեր առաջատար մարզուհիներից մեկը: Նա հավաքականի գլխավոր մարզիչն է, միջազգային կարգի մրցավար և մանկավարժական գիտությունների թեկնածու է:

 

Այլ նորություններ