Եվրոպայի  օլիմպիական կոմիտեի ասոցիացիայի  / EOC /  գործկոմի  հերթական նիստը տեղի է ունեցել առցանց ձևաչափով: Այն ղեկավարել է ԵՕԿ նախագահի պաշտոնակատար Նիլս Նիգաարդը։ Քննարկվել են  Տոկիոյի օլիմպիական խաղերի, Եվրոպական երրորդ  խաղերի նախապատրաստության և այլ հարցեր։

Հույս է հայտնվել , որ չնայած համավարակին, այնուամենայնիվ  Ճապոնիայում ամառային մարզահանդեսը կկայանա։ 

Անդրադարձ է եղել նաև  ԵՕԿ 50-րդ հոբելյանական  համաժողովի կազմակերպմանը, որ նախատեսված է Աթենքում , առաջիկա ապրիլին։ Պատվիրակները պետք է ընտրեն կազմակերպության նախագահին, գործկոմի, ինչպես նաև հանձնաժողովների անդամներին: Հարցի վերջնական որոշումը պետք է կայացվի  մարտին: 

Հունաստանի ԱՕԿ-ի ղեկավար Սպիրոս Կապրալոսը տեղեկացրել է , որ  իր երկրում համաճարակաբանական իրավիճակը շարունակում է մնալ ծանր և փետրվարի 11-ից կրկին ներդրվել է  ամբողջական << արգելափակման >>  ռեժիմը: Հաշվի առնելով  այն հանգամանքը, որ ԵՕԿ-ի 50-ամյակը նախատեսվում է նշել  համաժողովի շրջանակներում, ձևաչափը միանշանակ պետք է լինի առկա: Հետևաբար, պետք է քննարկել  միջոցառումները հետաձգելու  հարցը։

Եվրոպական երրորդ խաղերը  համակարգող հանձնաժողովի ղեկավար Հասան Արատը տեղեկացրել է միջոցառման  նախապատրաստական աշխատանքների մասին։Նրա խոսքով, գործընթացին խոչընդոտում է այն փաստը, որ EOC- ի և ընդունող երկիր Լեհաստանի  միջև խաղերը հյուրընկալելու իրավունքի պայմանագիր դեռ չի ստորագրվել: 

Խնդիր է նաև այն , որ  հաստատված չէ  մարզաձևերի ցանկը։ Տեղեկացվել է, որ արդեն ութ ֆեդերացիաների հետ ձեռք են բերվել պայմանավորվածություններ, մյուսների հետ շարունակվում են բանակցությունները։

Խոսվել է   նաև Տոկիոյում անվտանգ օլիմպիական խաղերի անցկացման  ուղեցույցի, ինչպես նաև սպորտի նախարարների, հովանավորների, հյուրերի, չհավատարմագրված անձանց խաղեր մեկնելու հնարավորության և հանդիսականների ներկայության  հարցերի մասին:

Ճապոնիայի իշխանությունները հանդիսականների մասին  որոշումները  կկայացնեն մարտ-ապրիլ ամիսներին: Դիտարկվում են  տարբերակներ։