Կես տարի է, որ Հայաստանի աթլետիկայի գլխավոր մարզիչ է ընտրվել մանկավարժական գիտությունների թեկածու, գյումրեցի  Գրիգոր Բարսեղյանը:  Նա լավ աշխատանքով է արժանացել  նման պատվի: Հեռակապով զրուցեցինք նրա հետ:  Ասաց , որ ութ հոգուց բաղկացած թիմ է ուղեկցելու մարտի 5 –ին Բալկանյան երկրների ՝ մարզասրահներում անցկացվող առաջնություն:

Ցատկորդների վերաբերյալ  մեր հարցին պատասխանեց, որ մրցումներին կմասնակցի կապանցի  ճանաչված եռացատկորդ  Լևոն Աղասյանը:  Միջին տարածությունների վազքում իր ունակությունները կդրսևորի գյումրեցի Երվանդ Մկրտչյանը:

Գյումրին ունի ցատկորդների լավ ավանդույթ: Հիշենք  աշխարհի վեցերորդ մրցանակակիր Հովհաննես Ստեփանյանին,օլիմպիական խաղերի հինգերորդ մրցանակակիր,եռացատկորդ Արմեն Մարտիրոսյանին, Եվրոպայի չգերազանցվող ռեկորդակիր, հեռացատկորդ Ռոբերտ Էմմիյանին . . .

Երկրի երկրորդ քաղաքում շնորհալի ցատկորդներ կան, բայց  առաջադիմելու պայմանները բավարար չեն:  Մասնագետը մեծ հույսեր է կապել եռացատկորդ Ռազմիկ Ղազարյանի հետ: Բայց նա վերջերս զորակոչվել է բանակ: Մարզական լավ ապագա ունի նաև  18 –ը դեռ չբոլորած, արտաշատցի Գոռ Հովակիմյանը: Գոնե լավ է, որ բանակ զորակոչված  կապանցի  Գոռ Բեգլարյանը ընդգրկված է  մարզական վաշտում:

Հայաստանում աթլետիկա մարզաձևով պարապում է ավելի քան 1000 մարզիկ –մարզուհի: Սա անհամեմատ փոքր թիվ է: Ռազմավարական նշանակություն ունեցող աթլետիկայով մեզանում պետք է մարզվեին  նվազագույնը 4 – 5 հազար տղաներ ու աղջկներ: Ավաղ, այդպես չէ, քանզի անբավարար են մարզումային պայմանները: Ասածը վկայում է թեկուզ այն , որ Երևանը աշխարհի միլիոնանաց միակ քաղաքն է, ուր  բավարար պայմաններ ունեցող նույնիսկ մեկ մարզահամալիր չունի: Իհարկե, լավ է, որ Արտաշատի վերանորոգվող ստադիոնում ռետինածածկ   վազքուղիներ  ու մարզական այլ հատվածներ կառուցելու աշխատանքը եռում է, բայց դա խնդրին լիակատար լուծում չի տալու: Եթե ոչ մայրաքաղաքում, ապա գոնե  ավելի մեծ թվով  բնակչություն ունեցող Գյումրիում կամ Վանաձորում պիտի տեղակայվեին ռետինապատ մակերեսները:

Գլխավոր մարզիչը նաև ասաց , որ Լևոն Աղասյանը մեր երկիրը կներկայացնի Սերբիայում մարտի 18 -20 –ը անցկացվելիք մարզասրահների աշխարհի առաջնությունում: Հունիսի 11 –ին ՀՀ հավաքականը  կմասնակցի Մալթայում նախատեսված Եվրոպայի փոքր երկրների առաջնությանը, իսկ հուլիսին և օգոստոսին՝  աշխարհի և Եվրոպայի առաջնություններին: