Նյու Յորքում,  ՄԱԿ-ի Գլխավոր վեհաժողովի 79-րդ նստաշրջանի շրջանակում,  միջազգային օլիմպիական կոմիտեի (ՄՕԿ) նախագահ Թոմաս Բախը մասնակցել է Ապագայի գագաթնաժողովին:

Բախը դիմել է վեհաժողովի մասնակից  համաշխարհային առաջնորդներին և շնորհակալություն  հայտնել՝  սպորտը ապագայի համար պայմանագրի մեջ ներառելու համար: Այդ ուղենշային փաստաթուղթը ընդունել են ՄԱԿ-ի 193 անդամ երկրներ:

Մշակույթը, ինչպես նաև սպորտը, անհատներին և համայնքներին տալիս է ինքնության ուժեղ զգացում և նպաստում է սոցիալական համախմբվածությանը:

Փաստաթղթում ՄԱԿ-ի անդամ երկրները պարտավորվում են ներդնել բոլորի համար մատչելի, անվտանգ, ներառական և հավասար որակյալ կրթություն,  ներառյալ՝ ֆիզիկական դաստիարակությունը և սպորտը:  

ՄԱԿ-ի գագաթնաժողովում  ՄՕԿ-ի նախագահն ասել է՝  մենք ուրախ  ենք, որ չնայած աշխարհաքաղաքական լարվածությանը, կարողացանք համախմբել  բոլոր 206 ազգային օլիմպիական կոմիտեների մարզիկներին և ՄՕԿ-ի փախստականների հավաքականին:  Փարիզի օլիմպիական խաղերի ժամանակ  նրանք միմյանց հետ մրցում էին,  ապրում մեկ հարկի տակ, միասին սնվում, կիսվում իրենց փորձով ու  հույզերով: Նրանք հարգում էին միմյանց,  նույնիսկ այն դեպքում, երբ իրենց երկրները միմյանց դեմ  պատերազմում էին: Այդ ամենի միջոցով օլիմպիականները ստեղծեցին խաղաղության մշակույթ՝ ցույց տալով, թե ինչպիսին կլիներ մեր աշխարհը, եթե մենք բոլորս ապրեինք խաղաղ համակեցության՝ օլիմպիական ոգով: