ՄՕԿ –ի 44 –րդ  վեհաժողովում,  նախագահի ընտրությունում,   բացարձակ մեծամասնությամբ հաղթող ճանաչվեց 41 –ամյա Քիրստի Քովենտրին / Զիմբաբվե /: Նա  գերազանցեց  մյուս վեց թեկնածուներին և 130 –ամյա ՄՕԿ –ի պատմության մեջ դարձավ առաջին կին ղեկավարը, որը  թվով տասներորդն է:

Քովենտրին  ոչ միայն առաջին կին ղեկավարն  է, այլ նաև առաջին աֆրիկացի և ամենաերիտասարդ նախագահը՝  Պիեռ դե Կուբերտենից հետո: Մինչ այժմ ՄՕԿ-ի բոլոր ղեկավարները եվրոպացի են եղել, բացառությամբ՝ ամերիկացի Էյվերի Բրունդիջի։

Նորընտիր նախագահը լողորդուհի է և Աֆրիկա աշխարհամասից  օլիմպիական խաղերի ամենաշատ՝  յոթակի մեդալակիրը.  կրկնակի չեմպիոն  (2004թ., 2008թ.), եռակի փոխչեմպիոն և  մեկ բրոնզե պարգև: Եղել է նաև  աշխարհի եռակի ոսկե դափնեկիր:  

2018թ. Զիմբաբվեի սպորտի, հանգստի, արվեստի և մշակույթի նախարարն է, 2023թ. ՄՕԿ-ի գործկոմի անդամ և մարզիկների հանձնաժողովի նախագահը։

Քովենտրին ՄՕԿ –ի   նախագահի ղեկը պաշտոնապես  կստանձնի  առաջիկա հունիսի 23-ին:

Ընտրվելուց հետո տիկին նախագահը մասնավորապես ասել է, որ իննամյա հասակում է լողավազան ոտք դրել ու չի պատկերացրել, որ երբևիցե մի օր կդառնա համաշխարհային սպորտի ամենահեղինակավոր կազմակերպության ղեկավարը: Դա մեծ պատիվ և հանձնառություն է:  

Սպորտը միավորելու, ոգեշնչելու և հնարավորություններ ստեղծելու անզուգական ուժ ունի և պետք է հավատալ, որ միասնությամբ է հնարավոր զարգացնել այդ ուժը:

Օլիմպիական ամբողջ ընտանիքով հարկ  է պահել և ամրապնդել  կազմակերպության  ամուր հիմքերը, պաշտպանել բարեկամության, գերազանցության և հարգանքի արժեքները:

Քովենտրին ստացել է ընտրողների 49 ձայն, Սամարանչ կրտսերը՝ 28 , Քոուն՝ 8, Վատանաբեն և Լապարթյեն՝ 4-ական, Էլիաշն ու ալ-Հուսեյնը՝ 2-ական։