Շենգավիթի թաղապետարանի մարզադպրոցում  անցկացվեց  Հայաստանի նետաձգության ձմեռային առաջնությունը: Ասպարեզ ելան 45 մարզիկ –մարզուհիներ: Նրանք մրցեցին  18 մետր հեռավորությունից ` երկուական  նետարձակումով: Չեմպիոններ դարձան Վասիլ Շահնազարյանը և Մերի  Մխաջրջյանը:

Մրցաշարի արդյունքներով ձևավորվեց  հավաքական, որը  փետրվարի 10 –ին` 15 –օրյա ուսումնամարզական հավաքի կմեկնի  Բաթում:

Հավաքականի գլխավոր մարզիչ Բորիս Վասիլյանն ասաց, որ մասնակիցներն աչքի չընկան դիպուկությամբ, քանզի սա մրցաշրջանի առաջին մեկնարկն էր: Առաջիկա մարզումների և ուսումնամարզական հավաքի ընթացքում նշանառուները կվերականգնեն իրենց ունակությունները, ձեռք կբերեն լավ մարզավիճակ, որից հետո մեր երեք պատվիրակներ կմեկնեն Թուրքիայի Սամսուն քաղաք և կմասնակցեն փետրվարի 24 –ին սկսվող Եվրոպայի ձմեռային առաջնությանը: Կհաջորդի Ռումինիայի մայրաքաղաք Բուխարեստում կայանալիք  աշխարհի գավաթի խաղարկությունը, որտեղ կվիճարկվեն Մինսկում  հունիսին անցկացվելիք Եվրոպական երկրորդ խաղերի ուղեգրեր: Նույն ամսին, Հոլանդիայում,  մեր պատվիրակները հանդես կգան աշխարհի առաջնությունում: 1 – 44 –րդ տեղերն զբաղեցնողներին կշնորհվեն Տոկիոյի օլիմպիական խաղերի  ուղեգրեր:

ՀԱՕԿ լրատվական բաժին