Հակոբ Սերոբյան. Բարդ է լինելու, բայց պետք է պայքարենք օլիմպիական ուղեգրերի համար

18:46 - 07 Նոյ, 2019

Գերմանիայի Կոտբուս քաղաքում նոյեմբերի 18-25-ը կայանալիք աշխարհի գավաթի հերթական խաղարկությանը սպորտային մարմնամարզության Հայաստանի հավաքականը կմասնակցի 4 մարզիկով։ Հավաքականի գլխավոր մարզիչ Հակոբ Սերոբյանը ՀԱՕԿ լրատվականի հետ զրույցում խոսեց մրցաշարից ակնկալիքների մասին:

«Կոտբուս մեկնում ենք 4 մարզիկով՝ Հարություն Մերդինյան, Վահագն Դավթյան, Արթուր Դավթյան, Արթուր Ավետիսյան։ Արթուր Թովմասյանը բուժվում է ուսի վնասվածքից, ինչի պատճառով չի մասնակցի այս մրցաշարին։ Կոտբուսում մեր հիմնական նպատակը լինելու է Օլիմպիական խաղերի վարկանիշ նվաճելը։ Բարդ է լինելու, քանի որ հնարավորությունները քիչ են, բայց պետք է պայքարենք։ Առաջին անգամ աշխարհի գավաթին կմասնակցի Արթուր Ավետիսյանը, փորձը ցույց է տալիս, որ նա կարողանում է մրցաշարերի ժամանակ բարձր արդյունք ցույց տալ։ Եթե այնտեղ հաղթող ունեցանք, ապա իմաստ կլինի պայքարել միավորներով և փետրվարին մեկնել Ավստրալիա՝ աշխարհի գավաթի հաջորդ փուլին»,- ասաց մարզիչը։

Հակոբ Սերոբյանը հայտնեց, որ Հարություն Մերդինյանը մասնակցելու է նժույգի թափեր վարժությունում, Վահագն Դավթյանն ու Արթուր Ավետիսյանը՝ օղակներում, իսկ Արթուր Դավթյանը՝ նժույգի թափերում, հենացատկում ու պտտաձողում։

«Հիմնականում բարդացնում ենք Արթուր Դավթյանի վարժությունները, տեսնենք՝ ինչ գնահատականներ կստանա: Ավելի հետախուզական ելույթ է լինելու, քանի որ նա արդեն նվաճել է օլիմպիական ուղեգիր»,- նշեց մարզիչը։

Այլ նորություններ