Եվրոպայի ծանրամարտի առաջնությունում  մեր պատվիրակների մասնակցությամբ  բոլոր օրերին ավելանում է ՀՀ թիմի մեդալակիրների քանակը: Փաստն ինքնին վկայում է, որ բազմափորձ մասնագետ Փաշիկ Ալավերդյանի գլխավորած մարզչական խումբը,  իր սկզբունքներին հավատարիմ,  հիանալի աշխատանքներ է կատարել նախապատրաստական փուլերում:

Երեկ երեկոյան, 102 կգ քաշայինների պայքարի վերջնափուլում, ինչպես միշտ, տոն տվեցին նաև մեր երկու ծանրորդները. Սամվել Գասպարյանը և Գարիկ Կարապետյանը: Նույն հաջորդականությամբ նրանք տեղ գտան պատվանդանի երկրորդ և երրորդ աստիճանին:  

Սամվել Գասպարյանը երկամարտի 396 կգ արդյունքով նվաճեց փոխչեմպիոնի կոչումը / 180 կգ +216 կգ /, իսկ  Գարիկ Կարապետյանը 394 կգ – ով բավարարվեց << բրոնզով >>  / 182 կգ  + 212 կգ /: 

Մեդալի իրական հավակնորդ էր նաև Պետրոս Պետրոսյանը / 109 կգ /: Ավաղ, առաջին մոտեցման ընթացքում,  նա արմնկահոդի վնասվածք ստացավ և դուրս մնաց պայքարից:

Կանանց 87 կգ քաշայինների մրցավեճում առաջատարների խմբում էին Հռիփսիմե Խուրշուդյանը և Տաթև Հակոբյանը:

Երկամարտում նրանք ցույց տվեցին միևնույն`  227 կգ արդյունք: Կանոնակարգի համաձայն Հռիփսիմեն ճանաչվեց բրոնզե մեդալակիր , իսկ Տաթևը ՝ չորրորդ մրցանակակիր: Առանձին վարժություններում Հռիփսիմեն պոկեց 105 կգ, հրեց 122 կգ, իսկ թիմակցուհին համապատասխանաբար ՝ 103 կգ և 124 կգ:

Սոֆիայի ստուգատեսում հուզիչ էր Հռիփսիմեի մրցելույթը: Հրում  վարժությունից հետո,  երկու երեխաների մայր,  36 –ամյա Հռիփսիմեն  հենց ծանրահարթակի վրա հանեց մարզակոշիկները, համբուրեց ծանրաձողը, խոնարհումով շնորհակալություն հայտնեց մարզասերներին ու նրանց ծափողջյունների ուղեկցությամբ հեռացավ բեմից:

Այդ պահին հիշեցինք մեծն Շառլ Ազնավուրին, ով մի հարցազրույցում ասել է, թե հայը շատ զգացմունքային է և նա արտասվում է թե  ուրախության, թե տխրության ժամանակ:

Հռիփսիմեին հասկանալը դժվար չէր: Իսկապես հեշտ  է ասել քառորդ դար լինել մրցահարթակում  ու  մի օր էլ, սպորտի օրենքով դադարել մարզիկ լինելուց:

Կարծում ենք անդավաճան Հռիփսիմե Խուրշուդյանը իր գործունեությունը կշարունակի հարազատ մարզաձևում և կնպաստի հետագա հաջողություններին:

Հայ մարզասերն այսօր նույնպես ուրախանալու առիթ կունենա: Առաջնության վերջին  <<  ճակատամարտում >> իրենց ունակությունները կդրսևորեն մեր ճանաչված գերծանրքաշայիններ Սիմոն Մարտիրոսյանը և Վարազդատ Լալայանը: