ՀԱՎԱՏԱՐԻՄ ՄՆԱԼ ԱՎԱՆԴՈՒՅԹՆԵՐԻՆ

12:17 - 15 Հուլ, 2025

Մայրաքաղաքի Երևանյան լճում անցկացվեց բայդարկա և կանոէ թիավարության  Հայաստանի առաջնությունը:

Տանտերերից բացի, ջրուղիներում մրցեցին  Սևանի, Հրազդանի և Էջմիածնի 72 մարզիկ – մարզուհիներ:

Ստուգատեսի մասին ՀՀ թիավարության ֆեդերացիայի նախագահ, սպորտի վարպետ Տիգրան Սարգսյանը մեզ հետ զրույցում ասաց, որ լավ պատրաստականությամբ առանձնացան սևանցիները: Նրանք, ինչպես միշտ, աչքի ընկան կանոէ մրցաձևում,  ավելին,  մրցանակներ շահեցին  նաև բայդարկայում:

Նշած փաստերը ուրախացնող են: Մեր զրուցակիցը նաև ընդգծեց, որ սևանցիների առավելությունը նաև պիտի սթափեցնի իր բոլոր գործընկերներին, և հատակապես երևանցի մասնագետներին: Հիշենք, որ  երևանյան լճում վարպետության դասեր են ստացել ու աճել, առնականացել  բազմաթիվ վարպետներ: Պետք է հավատարիմ մնալ ավանդույթներին ու միլիոնանոց մեր մայրաքաղաքի՝ թիավարել ցանկացող  շնորհալի պատանիներին չպիտի   հուսախաբ անել:

Առաջնության արդյունքներով կազմվել է հավաքական, որը կմասնակցի Իտալիայի Միլանում օգոստոսի 20 – 24 –ը անցկացվելիք աշխարհի առաջնությանը: Թիմը մրցավայր կուղեկցի սևանցի մարզիչ Ավետիք Մալխասյանը:

Մեր երկրի մարզական դրոշի պատիվը կպաշտպանեն կանոէի ՝ Վահե Դավթյան- Գևորգ Փիլոսյան երկյակը և բայդարկայի ՝ Էդգար Թության- Արթուր Ակիշին- Կարեն Սուլթանյան – Տիգրան Խաչատրյան քառյակը:

Տեղեկացնենք, որ առաջիկա շաբաթ օրը ՝ հուլիսի 19 –ին, ՀՀ առաջնության ծրագրով Երևանյան լճում կմրցեն ակադեմիական թիավարները, իսկ օգոստոսի երկուսին  Սևանում հանդես կգան երիտասարդականի մասնակիցները:

Այլ նորություններ