Ամերիկյան NBCUniversal հեռուստաալիքի տվյալներով՝  25 –րդ ձմեռային խաղերի դիտման միջին ցուցանիշը NBC, Peacock, CNBC, USA Network և այլ թվային հարթակներում կազմել է 23.5 միլիոն, ինչը 96%-ով ավելի է չորս տարի առաջ Պեկինում կայացած մարզահանդեսից:  Այս առումով 2026թ.  խաղերը գերազանցել են Փհենչհանի,  բայց զիջել են Սոչիի օլիմպիական խաղերին։

«Շատ ցուցանիշներով  խաղերը գերազանցեցին մեր սպասելիքները։ Մենք կրկին տեսանք, որ օլիմպիական ստուգատեսը ամենահետաքրքիր, անկանխատեսելի և մասշտաբային մարզական միջոցառումն է։ Իտալիայում տեղի ունեցածը զարմանալի է՝ ապշեցուցիչ տեսարաններ, մարզիկների և նրանց անձնական կյանքի աննախադեպ հասանելիություն և տեխնոլոգիա, ինչը թույլ տվեց հեռուստադիտողներին ընկղմվել մարզիկների պատմությունների մեջ ավելի խորը ձևով», - ասել է NBC-ի գործադիր պրոդյուսեր Մոլի Սոլոմոնին, որը պատասխանատու էր 2026թ.  խաղերի լուսաբանման համար։

ԱՄՆ-ի և Կանադայի միջև կայացած  հոկեյի մրցամարտը դիտել է 20.7 միլիոն հեռուստադիտող: Գագաթնակետը հասավ, երբ Նյու Ջերսի Դևիլսի հարձակվող Ջեք Հյուզը խփեց հաղթական գոլը՝  ուղիղ եթերում դիտեց 26 միլիոն մարդ:

Մարզահանդեսի ընդունող երկրում պետական հեռարձակող RAI-ն հաղորդել է, որ բացման արարողությանը հետևել է ավելի քան 9 միլիոն հեռուստադիտող: Ամենադիտված միջոցառումների շարքում են եղել  կանանց դահուկավազքը, որտեղ իտալացի Սոֆիա Գոջիան նվաճել է բրոնզե մեդալ, և լեռնադահուկային սպորտը, որտեղ հաղթել է  մեկ այլ տեղացի մարզիկ՝ Ֆեդերիկա Բրինյոնեն։

«Միլանում և Կորտինայում վերջերս ավարտված ձմեռային օլիմպիական խաղերը անմոռանալի իրադարձություն էին սպորտային  աշխարհում և դրանից դուրս։ RAI-ն այս միջոցառումները հեռարձակել է   յուրաքանչյուր իտալացու  տանը՝ սահմանելով ռեկորդային վարկանիշներ և գրավելով աննախադեպ լսարան», - ասել է  RAI-ի գործադիր տնօրեն Ջամպաոլո Ռոսսին։